Martxoaren 15ean, ostiralean, Bizkaiko taldekako bertso txapelketaren laugarren edizioari emango zaio hasiera Gernika-Lumoko kanporaketarekin. Aurtengoan hamasei taldek eman dute izena, eta gure eskualdea hiru taldek ordezkatuko dute: Karidadeko masokistak, Leioatik leioara eta Piratak bertso-taldea. Gora Uribe Kostako bertsogintza!!!

ALBEko German Kortabarriak bigarren saria irabazi du Bertsopentsiotan I. Bertso Jarrien Lehiaketan, Francoren mende jaioak gara izeneko bertso sortarekin. Lehenengo saria Rikardo Gonzalez de Duranak irabazi du eta hirugarrena Jesus Peñagarikanok. Guztira 60 bertso sorta aurkeztu ziren. ZORIONAK, German, gozatu sariaz eta segi bertsoak idazten eta kantatzen!

Larunbatean, martxoaren 9an, Berangon izan ziren Uribe Kosta Bertsolari Txapelketako lehen bi kanporaketak. Arrate Illaro eta Jone Uria izan ziren saioetako irabazleak eta martxoaren 23ko finalaurrekoetara pasatuko dira zuzenean. Beste bertsolariak puntuazioaren arabera sailkatuko dira.

Ostegunean, matxoaren 7an, emakumeen eguna ospatzeko bertso poteoa izango dugu Sopelan. Saioa Alkaiza eta Enare Muniategi bertsolariak izango ditugu kantuan, Repercusión Feminista batukadaren musikak lagunduta. 19:30ean, Laiak tabernatik hasiko da poteoa. Anima zaitezte!

Neguko azken egunotan, loreak bezala ernatu dira bertso txapelketak eta plazak: Uribe Kostako txapelketa, Bertso Erronda, Korrikako saioak... Hona hemen ALBEko bertsolariek non kantatuko duten martxoan zehar:

Korrika martxoaren 21ean pasako da Uribe Kostatik eta, horren aitzakian, eskualdeko herrietan agendak ekitaldiz bete dira. Bertsorik ez da faltako, noski. Igandean, 13:00etan, Algortako San Nikolas plazan, Korrika aurkezteko bertso poteoa egingo dugu, Arrate Illaro eta Peru Irastortza bertsolariekin. Martxoaren 16an, Beñat Lopez, Oier Aizpurua, Maialen Lago eta Imanol Uria bertsolariak izango dira kantuan Benta elkartean.