Heldu da Getxoko bertsolaritza ikasleek plaza erreala dastatzeko eguna. Asteartean, maiatzak 14, goizeko 10:00etan, Eskolatik Plazara ekimenak Areetako Andres Isasi Musika Eskolan batuko ditu, non Miren Amuriza eta Peru Irastortza bertsolariak izango dituzten bidelagun, Nahikari Ayo irakaslearen gidaritzapean.
Eguraldia epeltzen doa, uda laster izango dugu hemen, eta ALBEko bertsolariak eskualdeko hainbat plazatan izango ditugu kantari maiatzeko hilean: herrriko jaietako saioak, txapelketak, bertso bazkaria, Eskolatik Plazara...
Maiatzaren 9tik 15era arte iraungo dute aurtengo Getxoko Andra Mari jaiak. Eskaintza kultural zabalaren barruan, maiatzaren 12an (domeka), bertso saioa izango dugu 12:30ean, kiroldegiko aparkalekuan. Kantuan ALBEko Jone Uria, Naroa Torralba, Peru Irastortza eta Joanes Igeregi bertsolariak izango ditugu, Oihan Diaz gai-jartzailearen esanetara. Anima zaitezte!
Duela 30 urte egin zen lehenengo Kanpomartxo jaialdia Erandion, eta aurten, apirilaren 28an, Faoeta auzora bueltatuko da urteurrena ospatzeko. Berbotsek egun osoko jaialdia antolatu du, sorpresa eta ekintza ezberdinez beteta; horien artean, Onintza Enbeita eta ALBEko Peru Vidal bertsolariak izango ditugu kantuan, 13:30etatik aurrera. Anima zaitezte!
Larunbatean, apirilak 20, Bizkaiko Taldekako Txapelketaren 5. eta 6. kanporaketak jokatuko dira. Leioan eskualdeko Leioatik Leioara eta Busturialdeko Troiako Zaldia taldeek kantatuko dute, eta Urdulizen eskualdeko Pirata bertso-taldea eta Durangaldeko Durangalduek izango dira kanporaketan parte hartuko duten taldeak. Irabazleak maiatzaren 25eko finalaurrekoetara sailkatuko dira. Zorte on!
Hemen dator urteroko bertso bazkari klasiko udaberritsua. Maiatzaren 18an, zapatuan, Euskal Herriaren mutur biak batuko ditugu mahaiaren bueltan, Sustrai Colina urruñar iruindartuaren eta Jone Uria algortarraren bertsoak lokarri direla. Getxoko Benta kultur elkartearen lokal zaharberrituan bazkalduko dugu, Aritz Landeta bertako partaide eta ALBEkidearen bitartekaritzari esker.