2023ko BERTSO JAIALDI MUNDIALA ere itzela dator! Uztailaren 12an, Muxikebarri zentrora kantura etorriko dira Unai Iturriaga, Kerman Diaz, Julio Soto, Maialen Lujanbio, Miren Artetxe eta Jon Maia bertsolariak, esperimentazioa eta originaltasuna oinarri dituen jaialdia eskaintzeko. Gonbidapenak eskuragarri daude dagoeneko, anima zaitezte!

Igandean, Leioako bulebarrean izango da jaietako bertso saioa, urtero lez. 13:00etan hasita, kantuan izango ditugu Naroa Torralba, Julio Soto, Maddi Ane Txoperena eta Aitor Mendiluze bertsolariak. Erlantz Pazos izango da gai-jartzailea.

Aurten ekainaren 24an, larunbatean, izango da ALBEkideen eguna. Goizeko 9:30ean, Barrikako Nagusien Etxean gosalduko dugu. Ondoren, 10:00etan hasita, Barrikako labarretatik ibilaldia egingo dugu eta bazkalaurretik Plentziako alde zaharretik bertsotan eta poteoan arituko gara, trikiaz lagunduta. Bazkaria Plentziako Kai Eder klubean izango da, 23 eurotan. Apunta zaitezte!

Urtero bezala, Egizu elkarteak Umeen San Juan Sua antolatu du Algortako San Nikolas plazan, haur eta gaztetxoentzako hainbat ekintza biltzen dituen ekitaldia. Ekintza horien artean, June Diaz, Maialen Lago eta Peio Lago ALBEko bertsolariak kantuan izango dira 20:30ean.Egitarau osoa Egizuren webgunean duzue ikusgai.

Uda sasoiz eta gogoz hasiko dute ALBEko bertsolariek.  Hona hemen non kantatuko duten ekainean zehar:

Erandio Goikoako Gorpuzti jaiak ekainaren 8tik 11ra ospatuko dira. Larunbatean, ekainaren 10ean, ALBEk eta Jai batzordeak bertso saioa antolatu dute Goikolanda plazan. Kantuan Kerman Diaz, Paule Loizaga, Asier Alcedo eta Inazio Vidal izango ditugu, Iñaki Beitia Arbilduren gidaritzapean.