Udako oporrak atzean utzi ditugu, baina herriko jaiak ez dira oraindik amaitu! Hona hemen ALBEko bertsolariek non kantatuko duten:

Irailaren 22an, HITZAREN DANTZA ekimenaren 10. edizioak kolorez eta doinu ederrez beteko ditu Algortako kale eta plazak. Euskara lokarri hartuta, bertsoak, euskal kantak eta euskal dantzak izango dira nagusi goizeko Zazpi Jauzi kalejiran, bazkalosteko saioan eta arratsaldeko erromerian. Animatu zeuek ere hitza dantzan jartzera!

Erandioko San Agustin jaiak abuztuaren 27tik irailaren 1era ospatuko dira aurten. Urteroko bertso saioa abuztuaren 31n izango da, larunbatean, udaletxeko plazan. 13:00etan, kantuan izango ditugu Unai Mendiburu, Jexux Mari Irazu, Jone Uria eta Gorka Pagonabarraga bertsolariak, Iñaki Beitia "Arbildu" gai-jartzailearen esanetara. 

 Opor garaia bada ere, plazarik plaza dabiltza ALBEko bertsolariak. Herriko jaietako bertso saioak, jaialdi bereziak... hona hemen non kantatuko duten hil honetan:

Aurtengo Algortako Portu Zaharreko jaiak abuztuaren 9tik 12ra ospatuko dira eta, urtero lez, bertsoez gozatzeko aukera izango dugu. Inazio Vidal eta Oihana Bartra kantuan izango ditugu abuztuaren 11n, 19:30ean, Etxetxu plazan. Marmitako egunean, abuztuaren 12an, Unai Mendiburu, Galder Bilbao "Txapi" eta Inazio Vidal arituko dira bertsotan, 18:00etan, sari banaketaren aurretik.

Hurrengo ostegunean, abuztuaren 8an, Gorlizko terraza bertso-plaza saioa izango dugu. Aurreko urteetan Balkoirik Balkoi deiturikoa, aurten formatu berriarekin dator: Xabat Galletebeitia eta Oihana Bartra bertsolariek udaletxeko balkoitik kantatu ondoren, Gorlizko tabernen terrazetatik egingo dute ibilbidea, trikitilariek lagunduta. 20:00etan, Elizako plazatik hasita.