Urriaren 6an hasiko dira Gernika-Lumon Bizkaiko Bertsolari Txapelketaren kanporaketa saioak. 5 kanporaketa egingo dira eta 30 bertsolarik hartuko dute parte fase honetan. ALBEtik 8 bertsolari ibiliko dira kanporaketetan eta gai jartzaile, epaile eta talde antolatzailean ere bertso eskolako hainbat kide arituko dira. Eskerrik asko eta zorte on danori!
Badator HITZAREN DANTZA ekimenaren 4. edizioa! Heldu da hitza dantzan jartzeko ordua, Irailaren 16an egun osoko egitaraua izango dugu Getxon! Jantzi arrantzalez zein baserritarrez eta irten gurekin plazara hitza dantzatzera!!!
Badator urte osoan zehar irrikaz itxarondako bertso saioa: BERTSO JAIALDI MUNDIALA! Zatozte uztailaren 11n 21:00etan Algortako Biotz Alai plazara. Zein izango ote da aurtengo gaia???
Eguraldiaren kexa gehienen ahotan dabilen egunokaz, ALBEren UDAKO BERTSO-ESKAINTZA aurteztera gatoz, ondo jakinik euskal uda kulturalak atsegin dituela bertso-zaparradak!
Itsaso Bartolome diseinatzaileak ere lagundu digu udako kartelei argia eta distira ematen, bere forma eta kolore biziekin. Goazen, bada, ALBEren bertso-itsasoan murgiltzera!!!
Bertsozaletzeko moduko egun pasa zoragarria. Aurton Erandio aldean, Marian gogoan. Akarlandatik Martiartura, Fredi Cicerone dugula. Bazkaria Piñubarrin. Bazkalostean Roberto Etxebarria eta Idoia Markaida. Eta ostean, ahotsa galdu arteko bertso jarduna: hasiberriak, aritutakoak, beteranoak, gazteak eta gazteagoak... Eman izena lehenbailehen!!!
Villabona, 1801, balkoi banatan Jose Joakin Erroizena "Txabolategi" hernaniarra eta Juan Inazio Zabala amezketarra. Algorta, 2018, balkoi banatan Maialen Lujanbio hernaniarra eta Amets Arzallus hendaiarra. Utzi istorioak eta ekainaren 22an etorri Portu Zaharrera HISTORIA hizki larriz egitera!