Udazkenak hainbat plaza ekarri ditu gure bertsolarientzat; horien artean, Bizkaiko Bertsolari txapelketako kanporaketa saioak eta finalaurrekoak.

Getxo Enpresa elkartearekin elkarlanean, ALBEko bertsolariak Algortako eta Areetako hainbat dendetatik ibilbidea egingo dute urriaren 24an eta 25ean, denda horien ezaugarriei buruzko bertsoak kantatuz eta herria girotuz. Zatoz zu ere bertsoak entzutera eta herriko denden alde egitera! 

Lauhileko honetan, 6tik 12ra bitarteko umeek familia giroan bertsolaritzaren munduan murgiltzeko aukera izango dute Sendi proiektuarekin elkarlanean antolatutako tailerretan. Urriaren 23an, azaroaren 20an eta abenduaren 18an, ALBEko June Diaz Franco irakasleak gidatuta, jolasen bidez euskara eta bertsolaritzara hurbildu eta ahozkotasuna landuko dute. Txikientzako aukera aparta!

Igande honetan, irailaren 28an, Bizkaiko txapelketako lehen fasearen lehenengo saioa jokatu da Urdulizen. Fase honetan beste bost saio daude; Uribe Kostan jokatuko den beste saioa urriaren 12an egingo da Getxon. Ostean, finalaurrekoen bi buelta eigngo dira, eta azkenik, finala Bilboko La Casillan jokatuko da abenduaren 20an. ALBEko sei bertsolarik hartuko dute parte aurtengo txapelketan. Zorte on guztioi!

Joseba Etxebarria Uriarte larrabetzuarra zendu da; bizkoizketa aktorea, bertso eskola sortzailea eta Bizkaiko Txapelketako Talde Antolatzaileko kidea izateagatik ezaguna. Gugan bego!

Urrezko bertsozale / bat joan jaku bart; / ha bezain langin finik, / non dago beste bat? / Apala, elkarkoia, / jatorra erabat. / Joseba, lasai hartuik / atsedena behintzat: / argituko giozak / hire ereduak! ALBEko lagunak

Udazkenaren atarian, irailaren 21ean, domekaz, Algortako bazterrak bat-bateko bertsoz eta Euskal Herri osoko abesti zein dantzekin jantziko dira, HITZAREN DANTZA ekimenaren 11. edizioan. Euskara eta euskal kultura lokarri direla, egunpasa itzela egingo dugu. Animatu zeuek ere hitza dantzan jartzera!