Logoa
- 1995ean, Zuriñe Asteasu diseinatzaile gasteiztarrak sortu zuen gure eskolaren hasierako logoa (betikoa), Elkarte egin ginen urtean, hain zuzen ere.
- 2000n, Aitor Zumalabe diseinatzaile bilbotarrak sortu zuen 20. urteurreneko logoa, Zuriñeren diseinuan oinarrituta.
- 2005ean, Aitor Zumalabe diseinatzaile bilbotarrak sortu zuen 25. urteurreneko logoa, Zuriñeren diseinuan oinarrituta.
- 2015ean, Itsaso Bartolome diseinatzaile getxoztarrak hartu du Zuriñeren eta Aitorren lekukoa eta 35. Urteurreneko logoa diseinatu.
ALBEren 35. urteurreneko logo ofizialaren aurkezpenerako berbak
Abiatu 80an…
Luzaro bidean…
Bizia pausoa…
Etorkizuna oparoa!
ALBEk bete
35 urte.
ZORIONAK ALBE!
(Logoko irudiaren azalpena)
AL eta BE
pozik daude!
AL eta BE
aurrez aurre,
elkar musukatuz,
bertso-plaza sortuz;
plaza biribila
sortzeko bertsolari pila;
plaza biribila,
hasteko bertsoaren bila,
lantzeko gaitasun pila,
kantuan jartzeko isila,
lotsorra dadin espabila,
garatzeko bertsolari abila.
Helburuak mila,
baina nagusia
eskola baino gehiago den proiektu hau
luzaro eta osasuntsu bizi dadila!!!
BI MILA ETA HAMABOSTA
HANDIKIRO DEZAGUN OSPA!!!
Logo ofizialera heltzerako, Itsasok hainbat proba eta aldaera egin zituen aurretik. Haietariko batzuk kasuan kasuan erabiltzen ditugu. Hona hemen pare bat:
Leloa
- Hasierako logoan buru bi ikusten dira, bertsolari bi, gure eskolaren helburu nagusia aspalditxotik bertsolariak sortzea baita; eta idazkun hauxe: Algortako Bertsolari Eskola, gure eskolaren izaera beti eskualde mailakoa izan bada ere, lehenbiziko pausoak Algortan eman baikenituen.
- 20. urteurreneko leloa hauxe izan zen:
Hogei urtean
zuen artean
Lelo horren bitartez eskolaren 20 urteko ibilbidea ekarri nahi zen gogora, beste barik. Baina leloarekin hitz-jokoa eginez, 2000. urtean 20 betso-ekitaldi antolatzeko erronka bota genion geure buruari: «Hogei urte, hogei ekitaldi!»
Baita gainditu ere, azkenean 25 egin baigenituen.
- 25. urteurreneko leloa hauxe izan zen:
Hogeita bost urte
bertsoa bitarte
Lelo horren bitartez azpimarratu nahi izan genuen denbora luzez aritu ginela bertsogintzan, beste barik.
- Aurtengo leloan, baina, haratago joaten ahalegindu gara, gure errealitatea ere hasierako helburu xumeetatik haratago joan delakoan. Hauxe da aurtengo leloa:
Hogeita hamabost urte
hitza bihurtzen arte
Lelo honen bidez beretsogintza –beste hainbat gauza ez eze: hitzaren jolasa, hitzaren jokoa, hitzaren kirol nazionala…– artea ere badela gogorarazi nahi dugu, hitzaren artea, hain zuzen ere.
Eta ideia hori irudiz janzteko, Kandinskyren Inprovisation lanaz baliatzea otu zitzaigun; nor eta Kandinsky (mundu mailako artista ezaguna), zer eta Inprovisation, hau da, bertsogintzaren oinarri den bat-batekotasuna (webgune honen hondoan ere agertzen dira Kandinsky maisuaren pintzelkada alaiak).
Eta aurtengo logoaz ari garela, Itsaso Bartoloméren lana nabarmendu nahi dugu, diseinatzaile gazte horrek maisutasun ikaragarriaz fusionatu baititu hasierako logoa eta artearen ideia berri hori.
Egindako lanaren esker onez, hona hemen ALBEk Itsaso Bartolomé diseinatzaileari jarritako bertsoa:
Bertso berria,
ALBEren 35. urteurreneko logoa diseinatu duen
Itsaso Bartoloméri jarria
Bertsolari-eskola
bat gara gu, noski;
ALBE dugu izena,
zelako lau hizki!
Itsaso izendatu
dugunez «Kandinsky»,
haren lana dezagun
bihurtu abesti
eta lau haizetara
zabaldu oneski!