2016ko UKko Bertsolari Txapelketa… GOGOANGARRIA!

Hiru zapatutan burutu da inoiz Uribe Kostan egin den eskualdeko bertso txapelketarik ederrena! Formatu berrizalea zekarren aurtengoak: kanporaketa eta finalaurreko saioak tabernetan. Eta badirudi bete-betean asmatu dugula formatu berriaz. Jende andana batu da han-hemengo tabernetan. Tabernariak gogotsu eta konplize. Bertsolariak ere gustura, egitura informalago honekin.

UKko Txapelketaren trena Leioatik Algortara

Martxoaren 12an, zapatuz, Algortan jokatu zen 2016ko Uribe Kostako Bertsolari Txapelketaren bigarren kanporaketa. Aurreko zapatuan Leioan egin zen moduan, hiru toki desberdinetan egin ziren kaporaketa saioak Algortan. Lehenengoa Villamonte tabernan 19:00etan. Hango saioan Josu Landeta beteranoa jarri zen buru, eta ondoren Joanes Igeregi, Daniel de Miguel eta Arkaitz Gomez. Hurrengo saioa Ekin tabernan izan zen, eta Jone Uria bertsolari ezagunak lideratu zuen hango taldea; atzetik Peio Arondo, Pello Etxebarria eta Unai Larrazabal joan ziren. Eta eguneko akabuko geltokia Azebarri Kultur Elkartea izan zen. Azebarriko saioan Imanol Uria nagusitu zen, Itsaso Paia, Miren Loizaga eta Ekaitz Larrazabal “Katxo” bertsolarien aurretik.

Edonor bertsozaletzeko moduko hasiera

Abian da 2016ko Uribe Kostako Bertsolari txapelketa. Hogeitalau bertsolarik ekin diote eskualde hiperbertsozale honetako aurtongo txapel preziatua lortzeko bideari. Leioako kanporaketan, otsailak 5, hamabi bertsolari lehiatu ziren hiru tabernatan. Egin beharreko lana: hasierako agur puntuagarria, ofizioan hiruna bertso zortziko nagusian, beste hiruna zortziko txikian, eta bertso bat hitz bat gaitzat emanda.

2016ko ABRA SARIko txapela iparraldera

Kartela erakargarria: iparraldekoa (Aitor Servier), nafarra (Sarai Robles), arabarra (Asier Rubio), gipuzkoarra (Maialen Akizu) eta bizkaitar parea (Aitor Bizkarra eta ALBEko Paule Loizaga). Ekitaldia Azebarri Kultur Elkartearen txoko berrian, Euskal Herria kalean. 

Bertsokera klasikoa Jon Aurreren eskutik

Gure bat-bateko bertso-eskolarako osagai egokia topatu dugulakoan gaude. Gure bertsolari gazteek etorria dute, teknika onaren jabe dira, mikro aurreko ausardiarik ez dute falta. Baina batzuetan bertsolari eta bertsojartzaile klasikoei ez diegu behar beste denbora eskaintzen. Eta ez da bertsolarien edo bertsozaleen errua; egungo bizimodu estresagarriaren errua da, inorena izatekotan.

Denboran aurrera eta atzera ibili ginen

Halako batean, Algortako kasinoa itxuraldatzen hasi zen. Edadeko muslari eta briskalariak geldiro-geldiro ostontzen joan ziren. Hango banakako mahaiak amu formako mahai handi bakar bihurtuta lotu ziren. Eta amuari beita ipini behar. Txoko batean pantaila handia.