Argitaratze data: 2021/06/11
ENE ZENBAT POZ, BUELTAN DA ASE BERTSOZ!!!
Baraualdi baten ostean, atzera zabaldu zaigu bertsoz asetzeko aukera parebakoa. ALBEkook, Azebarrikoekin elkarlanean, jarraipena emango diogu bertsolarien eta bertsozaleen arteko bertso-ekimen mamitsu bezain arrakastatsu honi. Hileroko azken ostegunetako ohiturari eutsiz, ekainaren 24an Azebarrin nahi zaitugu, Donibaneko suaren inguruan bertso dantzan egiteko.
Argitaratze data: 2021/06/03
ALBEko bertsolariak Erandion kantuan

Ekainaren 3tik 6ra hainbat ekintza antolatu ditu Erandiogoikoko jai-batzordeak, jaiak ospatzeko. Horien artean, ekainaren 5ean, larunbatean, bertso saioa egongo da Goikolanda plazan. 18:00etan, Arrate Illaro, Inazio Vidal, Ander Elortegi eta Oihan Diaz bertsotan arituko dira, Xabi Sainz de la Mazaren gidaritzapean. 

ALBE familia batzeko eguna!

Datorren ekainaren 19an, larunbatean, aurtengo ALBE EGUNA ospatuko du ALBEk. Aurtengo ospakizuna  Areeta, Lamiako eta Leioa artekoa izango da. Itsasontziz itsasadarretik buelta bat eman, Leioaraino ibilaldi girotua egin eta Mendibile jatetxean bazkaltzeko aukera izango dute ALBEkideek, besteak beste, 20 eurotan. Apuntatzeko epea ekainaren 6ra arte izango da. Ez galdu aukera!

Argitaratze data: 2021/06/01
ZERUPETIK KARPAPERA, TRADIZIOA AURRERA!
23 urte joan dira ALBEk lehenengo Balkotik balkoira egin zuenetik, 1801eko Villabonako saioa gogoan. Aurtengoan, mugak muga, tradizio luzeari eutsiko diogu, baina ekitaldian zerua barik, Algortako Zabala ikastetxeko karpa izango dugu aterpe. Karpapea bertsoz janztea eta gure gogoa piztea Jone Uria eta Oihana Iguaran bertsolarien esku. Ekainaren 18an, ostiralean, bertan nahi zaituztegu. Eman izena tokiak amaitu orduko!
Argitaratze data: 2021/05/31
BERTSOLARIEN ARNASA EKAINEAN PLAZARIK PLAZA

Ekia gainean eta bertsolariak plazan. Hala behar zuen eta hala izango da, egoerak egoera eta mugak muga. ALBEko bertsolariak han-hemengo plazetan izango dira kantari. Hurreratu saioetara bertsoz elikatzera, euskal harriak ez dezan goroldiorik bil. 

June Diaz Eskolartekoan bigarren!

Bizkaiko Eskolarteko Bertsolari Txapelketako finala Igorren jokatu zen maiatzaren 29an. Araitz Katarain, Ixone Asategi, Izaro Bilbao, Janire Arrizabalaga, Jokin Ansotegi, eta ALBEko June Diaz, Maialen Lago eta Peio Lago bertsolariak lehiatu ziren larunbatean. Buruz burukora Janire eta June sailkatu ziren, Euskal Herriko Eskolarteko finalean lehiatzeko txartela lortuz. Azkenean, Janire Arrizabalagak jantzi zuen txapela, puntu gehien irabazi ostean.